კონფერენცია გურიის ტურისტული პოტენციალის შესახებ

ოზურგეთის მუნიციპალიტეტი პროექტის „მონაწილეობითი პრინციპები გურიის ტურიზმის განვითარების სტრატეგიისათვის“, ევროკავშირის მიერ გამოცხადებული კონკურსის გამარჯვებულია და გურიის ოთხივე მუნიციპალიტეტს აერთიანებს.

პროექტის ფარგლებში დღეს სასტუმრო „სემის“ საკონფერენციო დარბაზში კონფერენცია ჩატარდა. შეხვედრას გურის მხარის და რეგიონის მუნიციპალიტეტების ხელმძღვანელი პირები, ასევე დაცული ტერიტორიების სააგენტოსა და საქართველოს ტურიზმის ეროვნული ადმინისტრაციის, საქართველოს რეგიონალური განვითარებისა და ინფრასტრუქტურის სამინისტროს, ტურისტული სააგენტოებისა და მედიის წარმომადგენლები, ექსპერტები და ადგილობრივი მეწარმეები დაესწრნენ. 

შეხვედრა სამეთვალყურეო საბჭოს თავმჯდომარემ, ოზურგეთის მუნიციპალიტეტის გამგებელმა მერაბ ჭანუყვაძემ გახსნა და პროექტის მნიშვნელობაზე ისაუბრა. 
„ ეს არის უპრეცედენტო პროექტი, რომელიც მიმართულია გურიის პოტენციალის გამოკვლევასა და შეფასებაზე, მოქალაქეთა მცირემასშტაბიანი აქტივობების მხარადჭერაზე, ტურისტული ინფრასტრუქტურის განვითარებასა და სამოქმედო გეგმების შემუშავებაზე. შეიქმნა პროექტის ლოგო და სლოგანი სახელწოდებით – „რა ყოფილა გურია.“ ეს იყო პირველი ეტაპი, იმ დიდი სამუშაოსი, რაც უკვე დაწყებულია გურიაში ტურიზმის განვითარებისთვის,“- განაცხადა მერაბ ჭანუყვაძემ. 

დღის წესრიგით გათვალისწინებული საკითხები: შესრულებული სამუშაოები და საჭიროებები, პროექტის მონაწილე მუნიციპალიტეტების, საზოგადოებრივი ორგანიზაციების, ახალგაზრდა მეცნიერთა კლუბისა და სამოქალაქო საზოგადოების ინსტიტუტის წარმომადგენლებმა პრეზენტაციის სახით წარმოადგინეს. შეიქმნა მობილური აპლიკაცია, რომლის პრეზენტაციაც აპლიკანტი ორგანიზაციის – „ახალგაზრდა მეცნიერთა კლუბის“ ხელმძღვანელმა, ლევან მჟავანაძემ წარმოადგინა. აპლიკაციით შესაძლებელია ინფორმაციის მოპოვება გურიის ტურისტული ძეგლებისა და რეგიონში არსებული ტურსტული სერვისების შესახებ. 

შეხვედრაზე რეგიონალური განვითარებისა და ინფრასტრუქტურის სამინისტროს წარმომადგენელმა ოთარ კონჯარიამ გურიაში ტურიზმის განვითარების მხარდასაჭერად სამინისტროს მიერ შემუშავებული კონცეფცია გააჟღერა. 
როგორც ტურიზმის ეროვნული დეპარტამენტის წარმომადგენელმა მედეა ჯანიაშვილმა აღნიშნა დეპარტამენტის მხარდაჭერით დაიგეგმა ტრენინგები, შეიქმნა PR პროდუქტები და შემუშავდა გურიის რეგიონის ტურისტული რუკა. 

ოზურგეთის მუნიციპალიტეტის საკრებულოს აპარატის უფროსმა ნანა თავდუმაძემ, რომელიც ამავდროულად, პროექტის დირექტორია, შეხვედრის მონაწილეებს ინფორმაცია მიაწოდა სამომავლო აქტივობების შესახებ. 
შეხვედრის ბოლოს პროექტის პირველი ფაზის ფარგლებში დაგროვილი მასალები შეაჯამეს. 

ყველა უფლება დაცულია © ოზურგეთის ახალგაზრდა მეცნიერთა კლუბი

დოკუმენტების ძებნა